ಬ್ಯಾಚುಲರ್ ಕಿಚನ್ ನಲ್ಲಿ “ಬೆಳ್ಳುಳ್ಳಿ ಅನ್ನ”

ಇದು ಬ್ಯಾಚುಲರ್ ಕಿಚನ್ ನ ರೆಸಿಪಿ. ಬ್ರಹ್ಮಚಾರಿ-ಣಿಗಳಿಗಾಗಿಯೇ ಇರುವಂಥದ್ದು. ಮಾಡುವುದು ಸುಲಭವೂ ಮತ್ತು ಅಗ್ಗವೂ…

ಬೆಳ್ಳುಳ್ಳಿ ಎಂದ ಕೂಡಲೇ ಮೂಗು ಮುರಿಯಬೇಡಿ. ಅದರ ವಾಸನೆ ಅಥವಾ ಪರಿಮಳ ಸ್ವಲ್ಪ ಘಾಟಿರಬಹುದು. ಆದರೆ ಅದು ಬ್ರಹ್ಮಚಾರಿಗಳ ಗಡಿಬಿಡಿಗೆ ಅನುಕೂಲವಾದಷ್ಟು ಇನ್ಯಾವುದಕ್ಕೂ ಪ್ರಯೋಜನಕ್ಕೆ ಬಾರದು.
ಸಾಮಾನ್ಯವಾಗಿ, ಬ್ರಹ್ಮಚಾರಿಗಳ ರೂಮುಗಳಲ್ಲಿ ಏನೆಂದರೆ…ಅನ್ನ ಮಾಡೋದೇ ಹೆಚ್ಚು. ಇನ್ನು ಅದಕ್ಕೆ ಸಾರು, ಹುಳಿ, ಪಲ್ಯ ಅಂತ ಎಲ್ಲಿ ಮಾಡ್ತಾರೆ. ಹಾಗಂತ ದಿನವೂ ಚಿತ್ರಾನ್ನ ಮಾಡಿ ಮಾಡಿಯೂ ಬೇಜಾರು.
ಆಗ ಬೆಳ್ಳುಳ್ಳಿ ಅನ್ನ ಮಾಡಿ.
ಹತ್ತು ನಿಮಿಷದ ಕೆಲಸವಷ್ಟೇ. ಹಾಗೆ ಹೋಗಿ, ಹೀಗೆ ಬರೋದ್ರೊಳಗೆ ಮಾಡಿಬಿಡಬಹುದು. ಇದಕ್ಕೆ ಹೆಚ್ಚು ಸಾಮಾನುಗಳೂ ಬೇಕಿಲ್ಲ.

ಎರಡು ಗೆಡ್ಡೆ ಬೆಳ್ಳುಳ್ಳಿ
ಸ್ವಲ್ಪ ಕರಿಬೇವಿನ ಎಲೆ
ಸಾಸಿವೆ
ಉದ್ದಿನಬೇಳೆ
ಕಡ್ಲೆಬೇಳೆ
ಹಸಿಮೆಣಸು
ಒಣಮೆಣಸು
ಉಪ್ಪು

ಮೊದಲು ಮಾಡಿದ ಅನ್ನವನ್ನು ಬಟ್ಟಲಿಗೆ ಹಾಕಿ ತಣ್ಣಗಾಗಲು ಬಿಡಿ. ಬೆಳ್ಳುಳ್ಳಿಯ ಸಿಪ್ಪೆ ತೆಗೆದು ಸಿದ್ಧಪಡಿಸಿಟ್ಟುಕೊಳ್ಳಿ. ನಾಲ್ಕು ಹಸಿ ಮೆಣಸು ಸೀಳಿಕೊಳ್ಳಿ.

ಒಗ್ಗರಣೆಗೆ ಎರಡು ಒಣಮೆಣಸು ತುಂಡು ಮಾಡಿಕೊಂಡು, ಒಲೆ ಹಚ್ಚಿ ಬಾಣಲಿ ಇಡಿ (ಪಾತ್ರೆಯೂ ಆದೀತು). ಕಾವು ಸಣ್ಣಗಿರಲಿ. ಸ್ವಲ್ಪ ಎಣ್ಣೆ ಹಾಕಿ. ಎಣ್ಣೆ ಕಾದ ಕೂಡಲೇ ಅರ್ಧ ಟೀ ಸ್ಪೂನ್ ಸಾಸಿವೆ ಹಾಕಿ, ಪಟ್ ಪಟ್ ಎಂಬ ಸದ್ದು ಕೇಳುತ್ತಿದ್ದಂತೆ ಬೆಳ್ಳುಳ್ಳಿ ಹಾಕಿ. ಬಂಗಾರದ ಬಣ್ಣಕ್ಕೆ ಬರುತ್ತಿದ್ದಂತೆ ಸ್ವಲ್ಪ ಉದ್ದಿನಬೇಳೆ, ಕಡ್ಲೆಬೇಳೆ, ಒಣಮೆಣಸು ಹಾಕಿ. ಕೆಂಪಗಾಗುವಷ್ಟು ಹುರಿಯಿರಿ. ಕೆಂಪಗಾಗುತ್ತಿದ್ದಂತೆ ಹಸಿಮೆಣಸು, ಕರಿಬೇವಿನ ಎಲೆ ಹಾಕಿ ಹುರಿಯಿರಿ. ಆಮೇಲೆ ಉಪ್ಪು ಹಾಕಿ ಅನ್ನವನ್ನು ಹಾಕಿ ಕಲಸಿ. ಅಲ್ಲಿಗೆ ಬೆಳ್ಳುಳ್ಳಿ ಅನ್ನ ಸಿದ್ಧ.

ಇದಕ್ಕೆ ಬೇಕಾದವರು ಲಿಂಬೆಹಣ್ಣಿನ ರಸ ಬೆರೆಸಬಹುದು, ತೆಂಗಿನಕಾಯಿಯ ತುರಿ ಹಾಕಬಹುದು. ಕೊತ್ತಂಬರಿ ಸೊಪ್ಪು ಹಾಕಿ ಅಲಂಕರಿಸಬಹುದು.

ಮತ್ತೊಂದು ಪ್ರಮುಖ ಸಂಗತಿಯೆಂದರೆ, ಬ್ರಹ್ಮಚಾರಿಗಳ ಮನೆಯಲ್ಲಿ ಅನ್ನ ಉಳಿಯುವುದು ಹೆಚ್ಚು. ಇಂದಿನ ಅನ್ನ ನಾಳೆಗೆ ಉಳಿದಾಗ ತಂಗಳನ್ನ ತಿನ್ನಬೇಕು ಎಂದು ಬೇಸರವಿರುತ್ತದೆ. ಆ ದುಃಖವನ್ನು ಇದು ಹೋಗಲಾಡಿಸುತ್ತದೆ. ಅದಕ್ಕೆ ಅನ್ನ ಉಳಿದರೆ, ಅದಕ್ಕೆ ನೀರು ಹಾಕಿಡಿ. ಅದು ಕೆಟ್ಟು ಹೋಗುವುದಿಲ್ಲ. ಅದೇ ಅನ್ನವನ್ನು ಹಿಂಡಿ ಹಿಂಡಿ ನೀರಿನಾಂಶ ತೆಗೆದು ಬೆಳ್ಳುಳ್ಳಿ ಅನ್ನ ಮಾಡಬಹುದು. ಅದೇ ಹೆಚ್ಚು ರುಚಿ.

ಗಮನವಿಡಬೇಕಾದ ಅಂಶ
ಅನ್ನ ಬಟ್ಟಲಿಗೆ ಹಾಕಿ ತಣ್ಣಗೆ ಮಾಡಿದರೆ ಬೆಳ್ಳುಳ್ಳಿ ಅನ್ನ ಮುದ್ದೆಯಾಗುವುದಿಲ್ಲ.
ಇದಕ್ಕೆ ಶುಂಠಿ ಇತ್ಯಾದಿ ಹಾಕಬೇಡಿ. ಬೆಳ್ಳುಳ್ಳಿ ಮತ್ತು ಶುಂಠಿ ಎರಡರ ಘಾಟು ರುಚಿಯನ್ನೇ ಕೆಡಿಸುತ್ತದೆ.
ತಂಗಳನ್ನ ಎಂದು ಹೀಗಳೆಯಬೇಡಿ, ಬೆಳ್ಳುಳ್ಳಿ ಅನ್ನ ಮಾಡಿ.
ಬಹಳ ಸುಲಭ ಮತ್ತು ಕಡಿಮೆ ಸಮಯ ಹಿಡಿಯುವ ತಿಂಡಿ.

Advertisements

ಗಡಿಬಿಡಿಯ ಬಾಂಬೆ ಸಾಗು

ಗೆಳೆಯರೇ, ಬಾಂಬೆ ಸಾಗು ಮಾಡೋದು ಗೊತ್ತೇ?

ಇದೂ ಸಹಿತ ಗಡಿಬಿಡಿಯಲ್ಲಿ ಮಾಡೋ ಸೈಡ್ಸ್. ಅದರಲ್ಲೂ ಬ್ಯಾಚುಲರ್‌ಗಳು ಇದ್ದಕ್ಕಿದ್ದಂತೆ ಒಂದು ದಿನ ಗೆಳೆಯರನ್ನೆಲ್ಲಾ ಕೂಡಿಕೊಂಡು ಚಪಾತಿನೋ, ಪೂರಿನೋ ಮಾಡಲಿಕ್ಕೆ ಹೋಗ್ತಾರೆ. ಅದರಲ್ಲೂ ಸಂಸಾರಸ್ಥರ ಮನೆಯಲ್ಲೂ ಈ ಗಡಿಬಿಡಿ ಇದ್ದದ್ದೇ. 

ಯಾರೋ ನೆಂಟರು ಬರ್‍ತಾರೆ, ಪೂರಿನೋ, ದೋಸೆನೋ, ಚಪಾತಿನೋ ಮಾಡಿದಾಗ ಅದಕ್ಕೆ ಏನಾದರೂ ಪಲ್ಲೆ ತರಹ ಮಾಡ್ಬೇಕು. ಸಾಮಾನ್ಯವಾಗಿ ತರಕಾರಿ ಸಾಗುವನ್ನೋ ಬೇರೆ ಏನಾದರೂ ಮಾಡೋಕೆ ಸ್ವಲ್ಪ ಸಮಯ ಬೇಕು, ಕೆಲಸ ಜಾಸ್ತಿ. ಆ ಸಂದರ್ಭದಲ್ಲಿ ಏನ್ ಮಾಡ್ಬಹುದು ಎಂದ್ರೆ ಬಾಂಬೆ ಸಾಗು ಮಾಡ್ಬಹುದು. 

ಮಾಡೋದಂತೂ ಬಹಳ ಸರಳ ಹಾಗೂ ವೆಚ್ಚವೂ ಹೆಚ್ಚಿನದಲ್ಲ. ಅದಕ್ಕೆ ಬೇಕಾಗೋ ಸಾಮಾನುಗಳು ಇಷ್ಟೇ.

 

ಒಂದೆರಡು ಈರುಳ್ಳಿ

ಮೂರು ಆಲೂಗೆಡ್ಡೆ

ಒಂದೆರಡು ಟೊಮೆಟೊ

ಚಿಕ್ಕ ಬೆಳ್ಳುಳ್ಳಿ ಗೆಡ್ಡೆ

ಎರಡು ಟೀ ಸ್ಪೂನ್ ಕಡ್ಲೆಹಿಟ್ಟು

ಅರ್ಧ ಟೀ ಸ್ಪೂನ್ ಅರಿಶಿನ ಪುಡಿ

ಒಗ್ಗರಣೆಗೆ ಸಾಸಿವೆ, ಉದ್ದಿನಬೇಳೆ, ಕರಿಬೇವಿನ ಸೊಪ್ಪು

ಅಲಂಕಾರಕ್ಕೆ ಕೊತ್ತಂಬರಿ ಸೊಪ್ಪು

ಚೂರು ಇಂಗು

ಮೂರು ಹಸಿಮೆಣಸು

ಉಪ್ಪು

 

ಇಷ್ಟು ಇದ್ದರೆ ಬಾಂಬೆ ಸಾಗು ರೆಡಿ ಆದಂತೆಯೇ. ಸಾಮಾನ್ಯವಾಗಿ ಹೋಟೆಲ್‌ಗಳಲ್ಲಿ ಸಂಜೆ ಹೊತ್ತು ತಿಂಡಿಗೆ ಹೋದರೆ ಕೊಡುವುದು ಇದೇ ಸಾಗು. ರುಚಿಯಾಗಿರುತ್ತೆ. 

ಈರುಳ್ಳಿಯನ್ನು ಸಣ್ಣದಾಗಿ ಕತ್ತರಿಸಿಟ್ಟುಕೊಳ್ಳಬೇಕು. ಅದಕ್ಕಿಂತ ಮುನ್ನ ಆಲೂಗೆಡ್ಡೆಯನ್ನು ಬೇಯಲಿಕ್ಕೆ ಇಡಿ. ಐದು ವಿಷಲ್ ಕೂಗಲಿ, ಬಿಡಿ. ಬೆಳ್ಳುಳ್ಳಿ ಬೀಜಗಳನ್ನು ಸುಲಿದು, ಚಿಕ್ಕ ಚಿಕ್ಕ ಚೂರುಗಳನ್ನಾಗಿ ಮಾಡಿಕೊಳ್ಳಿ. ಟೊಮೆಟೋವನ್ನು ಸಣ್ಣದಾಗಿ ಕತ್ತರಿಸಿಕೊಳ್ಳಬೇಕು. ಹಸಿಮೆಣಸನ್ನು ಸೀಳಿಟ್ಟುಕೊಳ್ಳಿ.

ಒಲೆ ಹಚ್ಚಿ, ಅದರ ಮೇಲೆ ಬಾಣಲಿಯಿಟ್ಟು, ಒಗ್ಗರಣೆಗೆ ಎಣ್ಣೆ ಹಾಕಿ. ಎಣ್ಣೆ ಕಾದ ಕೂಡಲೇ ಸಾಸಿವೆ ಹಾಕಿ. ಸಾಸಿವೆ ಪಟ ಪಟ ಎಂದು ಹೊಟ್ಟುವವರೆಗೂ ತಾಳ್ಮೆಯಿಂದ ಕಾಯಿರಿ. ಒಂದೆರಡು ಹೊಟ್ಟುತ್ತಿದ್ದಂತೆ ಹತ್ತು ಕಾಳು ಉದ್ದಿನಬೇಳೆ ಹಾಕಿ ಕೆಂಪಗಾಗಲು ಬಿಡಿ. ನಂತರ ಬೆಳ್ಳುಳ್ಳಿ ಚೂರುಗಳನ್ನು ಹಾಕಿ, ಕೆಂಪಗಾಗಲಿ.

ಬಳಿಕ ಸೀಳಿದ ಹಸಿಮೆಣಸು ಹಾಕಿ, ಕರಿಬೇವಿನ ಎಲೆ ಹಾಕಿ ಹುರಿಯಿರಿ. ಹಸಿಮೆಣಸಿನ ಬೆನ್ನ ಮೇಲೆ ಗುಳ್ಳೆ ಗುಳ್ಳೆ ತರಹ ಆಗುತ್ತಿದ್ದಂತೆ (ಚೆನ್ನಾಗಿ ಫ್ರೈ ಆಗಿರುವುದರ ಲಕ್ಷಣ)ಈರುಳ್ಳಿಯನ್ನು ಹಾಕಿ ಹುರಿಯಿರಿ. ಆರಿಶಿನ ಪುಡಿ ಹಾಕಿ. ಕೆಲ ಕ್ಷಣಗಳ ನಂತರ ಟೊಮೆಟೊ ಹೋಳುಗಳನ್ನು ಹಾಕಿ ಚೆನ್ನಾಗಿ ಫ್ರೈ ಮಾಡಿ. ಸ್ವಲ್ಪ ನೀರನ್ನು ಹಾಕಿ ಕೆಲ ಕ್ಷಣ ಬೇಯಲು ಬಿಡಿ. 

ಬೆಂದ ಆಲೂಗೆಡ್ಡೆ ಸಿಪ್ಪೆ ತೆಗೆದು ಪುಡಿ ಮಾಡಿಟ್ಟುಕೊಳ್ಳಿ. ಈರುಳ್ಳಿ, ಟೊಮೆಟೋ ಬೆಂದಿದೆ ಎಂದೆನಿಸಿದಕೂಡಲೇ ಈ ಪುಡಿ ಮಾಡಿಟ್ಟ ಆಲೂಗೆಡ್ಡೆ ಹಾಕಿ ಕಲಕಿ. ಎರಡು ಚಮಚ (ಟೀ) ದಷ್ಟು ಉಪ್ಪು ಹಾಕಿ ಬೆರೆಸಿ. ಆಗ ಸಣ್ಣ ಕಪ್ ನಲ್ಲಿ ಎರಡು ಟೀ ಚಮಚ ಕಡ್ಲೆಹಿಟ್ಟನ್ನು ನೀರಿನಲ್ಲಿ ಕಲೆಸಿ ಬಾಣಲಿಗೆ ಹಾಕಿ ಕುದಿಯಲು ಬಿಡಿ. ಕೆಲ ಕ್ಷಣಗಳಲ್ಲೇ ಕುದ್ದ ನಂತರ ಅದು ಗಟ್ಟಿಯಾಗುತ್ತದೆ. ಆಮೇಲೆ ಕತ್ತರಿಸಿದ ಕೊತ್ತಂಬರಿ ಸೊಪ್ಪು ಹಾಕಿ. ಬಾಂಬೆ ಸಾಗು ಅಂದ್ರೆ ಇದೇ. ಕೆಲವರು ಬೆಳ್ಳುಳ್ಳಿ ಬಳಸುವುದಿಲ್ಲ. ಅಂಥವರು ಬಾಣಲಿಯನ್ನು ಒಲೆಯಿಂದ ಕೆಳಗಿಳಿಸುವ ಮೊದಲು ಸ್ವಲ್ಪ ಇಂಗು ಬೆರೆಸಬೇಕು. 

ಗಮನಿಸತಕ್ಕ ಅಂಶಗಳು

* ಬೆಳ್ಳುಳ್ಳಿ ಅಥವಾ ಇಂಗು ಹಾಕುವುದು, ಆಲೂಗೆಡ್ಡೆಯಲ್ಲಿನ ವಾಯು ಅಂಶವನ್ನು ಹೊಡೆದೋಡಿಸಲು.
* ಕಡ್ಲೆಹಿಟ್ಟನ್ನು ನೀರಿನಲ್ಲಿ ಕಲೆಸಿ ಹಾಕುವುದು ಒಂದು ಬಂಧ (ಕೂಡುಕೊಳ್ಳುವಿಕೆ) ಬರಲೆಂದು. ಇಲ್ಲದಿದ್ದರೆ ಆಲೂಗೆಡ್ಡೆ, ಈರುಳ್ಳಿ, ಟೊಮೆಟೊ ಮತ್ತು ಬೇಯಲು ಹಾಕಿದ ನೀರೆಲ್ಲವೂ ಪರಸ್ಪರ ಡೈವೋರ್ಸ್ ಕೊಟ್ಟುಕೊಂಡಂತೆ ಇರುತ್ತದೆ.
* ಮಕ್ಕಳಿರುವ ಮನೆಯಲ್ಲಿ ಯಾವಾಗಲೂ ಹಸಿಮೆಣಸನ್ನು ಸೀಳಿಯೇ ಬಳಸಬೇಕು. ಕಾರಣ, ತೆಗೆದಿಡಲು ಸುಲಭ ಹಾಗೂ ಬಹುಬೇಗ ಖಾರವನ್ನು ಬಿಡುವುದಿಲ್ಲ. ಸಣ್ಣ ಸಣ್ಣ ಹೋಳುಗಳಾಗಿ ಮಾಡಿಕೊಂಡರೆ, ನೀರಿನೊಂದಿಗೆ ಖಾರದ ಅಂಶವನ್ನು ಬಹುಬೇಗ ಬಿಡುತ್ತದೆ.
* ಇಂಗು ಮತ್ತು ಬೆಳ್ಳುಳ್ಳಿ ಎರಡನ್ನೂ ಬಳಸಬೇಡಿ, ಚೆನ್ನಾಗಿರುವುದಿಲ್ಲ.
* ಆಲೂಗೆಡ್ಡೆ ಕೊಂಡುಕೊಳ್ಳುವಾಗ ಸರಿಯಾಗಿ ಆರಿಸಿ, ಕೆಲ ಆಲೂಗೆಡ್ಡೆ ಮೇಲೆ ಹಸಿರು ಬಣ್ಣವಿದ್ದರೆ ಸರಿಯಾಗಿ ಬೇಯುವುದಿಲ್ಲ.

ರವೆ ದೋಸೆ ಮಾಡಿ ಹೇಳಿ

ಈ ಸಾರಿಯಿಂದ ಬ್ಯಾಚುಲರ್ ಕಿಚನ್ ಅಂಥ ಶುರು ಮಾಡಿದ್ದೀನಿ. ಆದಷ್ಟು ಬ್ರಹ್ಮಚಾರಿ-ಬ್ರಹ್ಮಚಾರಿಣಿಗಳ ಅನುಕೂಲಕ್ಕೆ ಹಾಗೂ ಅವರು ಹೊಂದಿರಬಹುದಾದ ಸೌಲಭ್ಯಗಳನ್ನು ಅರಿತುಕೊಂಡು ಸಾರು, ಸಾಂಬಾರು, ಉಪಾಹಾರಗಳನ್ನು ವಿವರಿಸುತ್ತೇನೆ. ಅದಕ್ಕೆ ಕೊಟ್ಟಿರುವ ಶೀರ್ಷಿಕೆ “ಬ್ಯಾಚುಲರ್ ಕಿಚನ್’ !

ಇದರೊಂದಿಗೆ ನಿಮಗೆ ಬೇಕಾಗುವ ರೆಸಿಪಿಯ ಪಟ್ಟಿಯನ್ನೂ ಸಲ್ಲಿಸಬಹುದು. ಅದಕ್ಕೂ ಪ್ರಯತ್ನಿಸ್ತೇನೆ.

ನನ್ನ ಬ್ಯಾಚುಲರ್ ಕಿಚನ್‌ನ ಮೊದಲ ಐಟಂ ರವೆದೋಸೆ. ರವೆ ದೋಸೆ ಮಾಡೋದು ಸುಲಭ. ಗೊತ್ತಿದೆಯಾ ? 

ನಿಜವಾಗಲೂ ಹೇಳಬೇಕಾದರೆ ರವೆ ಇಡ್ಲಿ ಮಾಡೋದಕ್ಕಿಂತಲೂ ರವೆ ದೋಸೆ ಸುಲಭ. ಹೌದು, ಹೋಟೆಲ್ ಆದಂತೆಯೇ ರೋಸ್ಟಾಗಿ, ರುಚಿ ರುಚಿಯಾಗಿ ದೋಸೆಯಾಗುತ್ತೆ. ಆ ಬಗ್ಗೆ ಅನುಮಾನ ಪಡೋ ಅಗತ್ಯವಿಲ್ಲ. 

ನೋಡಿ, ಸಾಮಾನ್ಯವಾಗಿ ಎರಡು ರೀತಿಯ ರವೆ ದೋಸೆ ಮಾಡ್ತಾರೆ. ಒಂದು ಟ್ರೆಡಿಷನಲ್ ರವೆ ದೋಸೆ. ಮತ್ತೊಂದು ಹೋಟೆಲ್ ರವೆ ದೋಸೆ. 

rava_dosas5

ಟ್ರೆಡಿಷನಲ್ ರವೆ ದೋಸೆ ಎಂದರೆ ಬಹಳ ವಿಶೇಷವೇನೂ ಇಲ್ಲ. ಉದ್ದಿನಹಿಟ್ಟಿಗೆ ನೆನೆಸಿದ ರವೆ ಹಾಕಿ ಕಲೆಸಿ ದೋಸೆ ಹೆಂಚಿಗೆ ಹಾಕೋದು. ಆದರೆ ಮತ್ತೊಂದು ರವೆ ದೋಸೆ ಮಾಡೋದು ಸ್ವಲ್ಪ ಬೇರೆ. ಅದಕ್ಕೆ ಯಾವ ಪೂರ್ವ ತಯಾರಿಯೂ ಬೇಕಿಲ್ಲ. ಅಂದರೆ ಹಿಂದಿನ ದಿನವೇ ಹಿಟ್ಟು ರುಬ್ಬಿಟ್ಟು ಹುಳಿ ಬರೋವರೆಗೆ ಕಾಯಬೇಕಿಲ್ಲ. 

ನಾಲ್ಕು ಮಂದಿಗೆ ಪ್ರಮಾಣ

ಸ್ವಲ್ಪ ಕೊತ್ತಂಬರಿ ಸೊಪ್ಪು, ಕರಿಬೇವು ಸೊಪ್ಪು, ಹಸಿಮೆಣಸಿನಕಾಯಿ ಸಣ್ಣದಾಗಿ ಕತ್ತರಿಸಿಕೊಳ್ಳಿ. ಈರುಳ್ಳಿ ಬೇಕಾದವರು ಸಣ್ಣಗೆ ಕತ್ತರಿಸಿಕೊಂಡು ಇದರೊಂದಿಗೆ ಹಾಕಿಕೊಳ್ಳಬಹುದು. ಆದರೆ ದೋಸೆ ತೆಗೆಯುವಾಗ ಸ್ವಲ್ಪ ಕಷ್ಟವೆನಿಸಲೂಬಹುದು. ಈ ಸಣ್ಣದಾಗಿ ಕತ್ತರಿಸಿದವುಗಳನ್ನು ಒಂದು ಪಾತ್ರೆಗೆ ಹಾಕಿಕೊಳ್ಳಿ.

ಎರಡೂವರೆ ಕಪ್ ರವೆ. ಇದರಲ್ಲಿ ಚಿರೋಟಿ ರವೆ ಇದ್ದರೆ ಒಳ್ಳೆಯದು. ಉಪ್ಪಿಟ್ಟು ರವೆ (ಮೀಡಿಯಂ ಸೋಜಿ) ಇದ್ದರೂ ಪರವಾಗಿಲ್ಲ. ಚಿರೋಟಿ ರವೆ ಎಂದರೆ ಅಂಗಡಿಯವರಿಗೆ ಅರ್ಥವಾಗದಿದ್ದರೆ ಕೇಸರಿಬಾತ್ ರವೆ ಎನ್ನಿ. ಉದಾಹರಣೆಗೆ ಒಂದು ಕಾಳಿನ ಹನ್ನೆರಡನೇ ಭಾಗ ಉಪ್ಪಿಟ್ಟು ರವೆ ಆದರೆ, ಕೇಸರಿಬಾತ್ ರವೆ ಅಥವಾ ಚಿರೋಟಿ ರವೆ ೧೮ ನೇ ಭಾಗ. ಅಂದರೆ ಅಷ್ಟು ಸಣ್ಣಗಿರುತ್ತದೆ. ರವೆ ಜತೆಗೆ ಎರಡು ಮುಷ್ಟಿಯಷ್ಟು ಅಕ್ಕಿ ಹಿಟ್ಟು ಬೆರೆಸಿ. ಸ್ವಲ್ಪ ಎಂದರೆ ಅರ್ಧ ಮುಷ್ಟಿಯಷ್ಟು ಮೈದಾ ಹಿಟ್ಟು ಹಾಕಿ. ಒಂದೂವರೆ ಕಪ್‌ನಷ್ಟು ಮೊಸರು ಹಾಕಿ ಕಲೆಸಿಕೊಳ್ಳಿ. ಹತ್ತು ನಿಮಿಷ ಬಿಡಿ. ಈ ಕಲೆಸಿಕೊಂಡ ಹಿಟ್ಟಿಗೆ ಸ್ವಲ್ಪ ಬಿಳಿ ಎಳ್ಳು ಹಾಗೂ ಹದಿನೈದು ಜೀರಿಗೆಯನ್ನು ಹಾಕಿಕೊಳ್ಳಿ. ಹಿಟ್ಟು ನೀರಾಗಿರಬೇಕು, ಉದಾಹರಣೆಗೆ ನೀರು ದೋಸೆಗೆ ಇರುವಂತೆಯೇ. ಹಿಟ್ಟು ದಪ್ಪ ಇದ್ದಷ್ಟು ದೋಸೆ ದಪ್ಪನಾಗುತ್ತದೆ, ತಿನ್ನಲೂ ಕಷ್ಟ, ಜತೆಗೆ ಗಟ್ಟಿ. 

ದೋಸೆ ಹೆಂಚು ಕಾಯಲು ಇಡಿ. ಸ್ವಲ್ಪ ಎಣ್ಣೆ ಹಚ್ಚಿ. ನೀರಾಗಿರುವ ಹಿಟ್ಟನ್ನು ಒಂದು ಸೌಟು ಸುರಿಯಿರಿ. ಅರ್ಧ ಆಕಾರ ಆಯಿತೆಂದರೆ, ಇನ್ನೂ ಸ್ವಲ್ಪ ಹಿಟ್ಟು ತೆಗೆದುಕೊಂಡು ಆಕಾರ ಪೂರ್ಣಗೊಳಿಸಿ. ಅದರ ಮೇಲೆ ಒಂದೆರಡು ಚಮಚ ಎಣ್ಣೆ ಹಾಕಿ ಬೇಯಲು ಬಿಡಿ, ಕೆಲ ನಿಮಿಷಗಳ ನಂತರ ಕೆಂಪಗಾಗುತ್ತಾ ಬರುತ್ತದೆ. ಆಗ ದೋಸೆ ಚುಂಚಕ (ಸಟಕ)ದಿಂದ ದೋಸೆಯ ಮೇಲ್ಬಾಗವನ್ನು ಮೆಲ್ಲಗೆ ಕೆರೆಸುವಂತೆ ತೆಗೆಯಿರಿ. ಅಂದರೆ ದೋಸೆಯೇ ಎದ್ದು ಬರುವಂತಲ್ಲ, ಮೆಲ್ಲಗೆ. ಹಾಗೆ ಬಂದ ಮೇಲ್ಪದರವನ್ನು ಮಧ್ಯೆ ಮಧ್ಯೆ ಇರುವ ರಂಧ್ರಕ್ಕೆ ಸವರುತ್ತಾ, ತುಂಬುತ್ತಾ ಬನ್ನಿ. ಪೇಂಟಿಂಗ್‌ನಲ್ಲಿ ಚಿತ್ರಕ್ಕೆ ಬಣ್ಣ ತುಂಬಿದ ಹಾಗೆ. ಅದಕ್ಕಿಂತಲೂ ಹೆಚ್ಚಾಗಿ ಮನೆಯ ಅಂಗಳದಲ್ಲಿ ಕೆಳ ಬಿದ್ದ ಬಣ್ಣವನ್ನು ರಂಗೋಲಿಗೆ ತುಂಬುತ್ತೀರಲ್ಲಾ ಹಾಗೆ. 

ಹಾಗೆ ಮಾಡಿದಾಗ ದೋಸೆ ರೋಸ್ಟಾಗುತ್ತಾ ಹಾಗೂ ತೆಗೆಯಲು ಅನುಕೂಲವಾಗುವಂತೆ ಒಂದೇ ಸಮನಾದ ದಪ್ಪ ಹಾಗೂ ಪದರಗೊಂಡಿರುತ್ತದೆ. ಅದನ್ನು ತೆಗೆಯಿರಿ. ಅಷ್ಟೇ, ರವೆ ದೋಸೆ ಮುಗಿಯಿತು. 

ಗಮನವಿಡಬೇಕಾದದ್ದು

  1. ರವೆ ದೋಸೆ ರೋಸ್ಟಾಗಿದ್ದಷ್ಟು ರುಚಿ. ಹಾಗಾಗಿ ಕೆಂಪಗಾಗುವವರೆಗೆ ಕಾಯಬೇಕು. 
  2. ಈರುಳ್ಳಿ ತುಂಡುಗಳನ್ನು ಹಾಕಿದರೆ, ಪದರವನ್ನು ಸವರುವಾಗ ದೋಸೆಯೇ ಎದ್ದು ಬರಬಹುದು. 
  3. ರೋಸ್ಟಾಗಲು ಸ್ವಲ್ಪ ಚೆನ್ನಾಗಿ ಎಣ್ಣೆ ಹಾಕಬೇಕು.
  4. ರವೆ ದೋಸೆ ಒಣಕಲು ಇರುವುದರಿಂದ ಎಣ್ಣೆ ಹಾಕಿದಷ್ಟು ಗರಿಮುರಿ, ತಿನ್ನಲು ರುಚಿ.
  5. ಶುಂಠಿಯನ್ನೂ ಹಾಕಬಹುದು. ಆದರೆ ಅತಿಚಿಕ್ಕಚೂರುಗಳನ್ನಾಗಿ ಮಾಡಿಕೊಳ್ಳಬೇಕು. 
  6. ಎಳ್ಳು ಹಾಕಿಕೊಂಡರೆ ಬರುವ ರುಚಿಯೂ ಬೇರೆ, ಪರಿಮಳವೂ ಬೇರೆ.
  7. ಇದೆಲ್ಲದರ ಮಧ್ಯೆ ಇದು ಬ್ಯಾಚುಲರ್‌ಗಳಿಗೂ ಮಾಡಲು ಅನುಕೂಲ.