ಕ್ಯಾಪ್ಸಿಕಂ ಮಸಾಲ

ಚಪಾತಿ, ಪುಲ್ಕ, ರೋಟಿಯಲ್ಲದೇ, ಗುಳಿಯಪ್ಪ (ಪಡ್ಡು), ದೋಸೆಗೂ ಇದು ರುಚಿ.

Capsicumಈ ಬಾರಿಯ ರೆಸಿಪಿ ಪಂಜಾಬಿ. ಇದು ಅಸಲಿ ಪಂಜಾಬಿ ಶೈಲಿಯ ಕ್ಯಾಪ್ಸಿಕಂ ಮಸಾಲ. ಹಾಗಾಗಿ, ಹೋಟೆಲಿನ ಮಸಾಲಕ್ಕೂ, ನನ್ನ ಮಸಾಲಕ್ಕೂ ಸ್ವಲ್ಪ ವ್ಯತ್ಯಾಸವಿದೆ.

ಮೂರು ಜನರ ಲೆಕ್ಕದಲ್ಲಿ ತರಕಾರಿ

  • 3 ಮಧ್ಯಮ ಗಾತ್ರದ ಕ್ಯಾಪ್ಸಿಕಂ
  • ಸಣ್ಣ 2 ಟೊಮೆಟೊ
  • 2 ಹಸಿಮೆಣಸು
  • 2 ಸಣ್ಣ ಈರುಳ್ಳಿ
  • 6 ಬೆಳ್ಳುಳ್ಳಿ ಎಸಳು
  • ಹಸಿಶುಂಠಿ ಒಂದು ಸಣ್ಣ ತುಂಡು
  • ಕೊತ್ತಂಬರಿ ಸೊಪ್ಪು

cashew

ಇತರೆ

  • ಹತ್ತರಿಂದ 15 ಶೇಂಗಾ ಬೀಜ
  • ಸ್ವಲ್ಪ ಗೋಡಂಬಿ
  • ಒಂದು ಚಮಚ ಕೊತ್ತಂಬರಿ ಬೀಜ
  • ಸ್ವಲ್ಪ ಜೀರಿಗೆ
  • ಎರಡು ಚಮಚ ಅಚ್ಚ ಮೆಣಸಿನ ಪುಡಿ
  • ಸ್ವಲ್ಪ ಎಣ್ಣೆ
  • ಎರಡು ಚಮಚ ಗರಂ ಮಸಾಲಾ ಪುಡಿ
  • ಉಪ್ಪು

ಶುರು ಮಾಡುವ ಮೊದಲು

  • ಅಡುಗೆ ಶುರು ಮಾಡುವ 10 ನಿಮಿಷ ಮೊದಲು ಎಲ್ಲ ತರಕಾರಿಗಳನ್ನೂ ತೊಳೆದು ಒಂದೆಡೆ ಗಾಳಿಗೆ ಹರಡಿಡಿ.
  • ಗೋಡಂಬಿ ಮತ್ತು ಶೇಂಗಾ ಬೀಜವನ್ನು ಹುರಿದು ತಣ್ಣಗೆ ಮಾಡಿ, ಪುಡಿ ಮಾಡಿಟ್ಟುಕೊಳ್ಳಿ.

ಈಗ ಆರಂಭ

ಕ್ಯಾಪ್ಸಿಕಂ ನ ಬೀಜ ತೆಗೆದು, ಸಣ್ಣ ಹೋಳುಗಳನ್ನಾಗಿ ಕತ್ತರಿಸಿಕೊಳ್ಳಿ. ಸಣ್ಣ ಹೋಳುಗಳೆಂದರೆ, ಬಹಳ ಸಣ್ಣದಲ್ಲ.

ಈರುಳ್ಳಿ, ಟೊಮೆಟೊ, ಹಸಿಮೆಣಸು, ಶುಂಠಿ, ಬೆಳ್ಳುಳ್ಳಿಯನ್ನು ಸಣ್ಣದಾಗಿ ಕತ್ತರಿಸಿ ಪ್ರತ್ಯೇಕವಾಗಿಟ್ಟುಕೊಳ್ಳಿ. ಶುಂಠಿ,ಬೆಳ್ಳುಳ್ಳಿಯನ್ನು ಪೇಸ್ಟ್ ನಂತೆ ಅರೆದಿಟ್ಟೂಕೊಳ್ಳಬಹುದು.

ಎಣ್ಣೆ ಬಾಣಲಿಯಿಟ್ಟು,ಸ್ವಲ್ಪ ಎಣ್ಣೆ ಹಾಕಿ. ಸಣ್ಣ ಕಾವಿರಲಿ. ಎಣ್ಣೆ ಕಾಯುತ್ತಿದ್ದಂತೆ ಕ್ಯಾಪ್ಸಿಕಂ ಹೋಳುಗಳನ್ನು ಹಾಕಿ ಹುರಿದು ಅದನ್ನುತೆಗೆದು ಪ್ರತ್ಯೇಕ ತಟ್ಟೆಯಲ್ಲಿಡಿ. ಇದಕ್ಕೆ 8 ರಿಂದ 10 ನಿಮಿಷ ಸಾಕು.

ನಂತರ ಅದೇ ಬಾಣಲಿಗೆ ಇನ್ನೂ ಸ್ವಲ್ಪ ಎಣ್ಣೆ ಹಾಕಿ, ಬಿಸಿಯಾದ ಕೂಡಲೇ ಕೊತ್ತಂಬರಿ ಬೀಜವನ್ನು ಕೈಯಲ್ಲಿ ಪುಡಿ ಮಾಡಿ ಹಾಕಿ. ಎರಡು ಕ್ಷಣದ ನಂತರ ಈರುಳ್ಳಿಯನ್ನು ಹಾಕಿ. ಕೆಂಪಗಾಗಲಿ. ಅನಂತರ ಟೊಮೆಟೋ ಹಾಕಿ. ಉಪ್ಪು ಹಾಕಿ. ಚೆನ್ನಾಗಿ ಬೇಯಿಸಿದಂತಾಗಲಿ. ಅಂದರೆ, ಟೊಮೆಟೋ ರಸವನ್ನು ಬಿಟ್ಟುಕೊಂಡು ಎಲ್ಲದರೊಂದಿಗೆ ಬೆರೆತಂತಾಗಿ ಗ್ರೇವಿಯಂತಾದಾಗ ಬೇರೆ ಪಾತ್ರೆಗೆ ತೆಗೆದಿಡಿ.

ಬಾಣಲಿಗೆ ಸ್ವಲ್ಪ ಎಣ್ಣೆ ಹಾಕಿ, ಜೀರಿಗೆಯನ್ನು ಹಾಕಿ. ಪರಿಮಳ ಬರುತ್ತಿದ್ದಂತೆ ಕತ್ತರಿಸಿದ ಬೆಳ್ಳುಳ್ಳಿ ಹಾಕಿ, ಸ್ವಲ್ಪ ಕೆಂಪಗಾಗುತ್ತಿದ್ದಂತೆ ಹಸಿಮೆಣಸು, ಶುಂಠಿ ಹಾಕಿ ಹುರಿಯಿರಿ. ಎಲ್ಲವೂ ಘಾಟು ಹೊರಬಿಡುತ್ತಿದ್ದಂತೆ ಪರಿಮಳ ಬರುತ್ತಿದ್ದಂತೆ ಆ ಗ್ರೇವಿಯನ್ನು ಹಾಕಿ ಕಲಸತೊಡಗಿ. ಸ್ವಲ್ಪ ಎಣ್ಣೆ ಮೇಲೆ ತೋರುತ್ತಿದ್ದಂತೆಯೇ ಹುರಿದ ಕ್ಯಾಪ್ಸಿಕಂ ಹೋಳುಗಳನ್ನು ಹಾಕಿ. ಮತ್ತೆ ಕಲಸಿ. ನಿಮಗೆ ಬೇಕಾದಷ್ಟು ನೀರು ಬೆರೆಸಿ. (ಡ್ರೈ ಇರಬೇಕೆನ್ನುವವರು ಹೆಚ್ಚು ನೀರು ಹಾಕುವುದು ಬೇಡ). ಕುದಿಯತೊಡಗಿದಂತೆಯೇ, ಗೋಡಂಬಿ,ಶೇಂಗಾ ಬೀಜದ ಹುಡಿ ಹಾಕಿ ಕಲಸಿ. ಈಗ ಸ್ವಲ್ಪ ಹೊತ್ತು ಹಾಗೇ ಬಿಡಿ. ಗ್ರೇವಿ ಕುದಿದು, ಎಣ್ಣೆ ಬಿಡತೊಡಗುತ್ತದೆ. ಆಗ ಬೇಕಾಗಿದ್ದರೆ ಮೆಣಸಿನ ಹುಡಿ ಮತ್ತು ಗರಂ ಮಸಾಲ ಹಾಕಿ ಕಲಸಿ, ಐದು ನಿಮಿಷ ಬಿಟ್ಟರೆ ಸಾಕು. ಅನಂತರ ಕತ್ತರಿಸಿದ ಕೊತ್ತಂಬರಿ ಸೊಪ್ಪು ಹಾಕಿ.

ಟಿಪ್ಸ್

  • ಕ್ಯಾಪ್ಸಿಕಂ ಹೋಳಿನ ಕಡು ಹಸಿರು ಬಣ್ಣ ನೀರಿನಲ್ಲಿ ಅದ್ದಿದಂತಾಗಿ, ಇನ್ನಷ್ಟು ಕಡು ಹಸಿರು (ಕಪ್ಪು ಮಿಶ್ರಿತ ಹಸಿರಂತೆ)ತೋರುವಾಗ ತೆಗೆಯಿರಿ. ಜಾಸ್ತಿ ಬೆಂದರೆ, ಕರುಮ್ ಕುರುಮ್ ಇರುವುದಿಲ್ಲ.
  • ಗೋಡಂಬಿ, ಶೇಂಗಾ ಬೀಜದ ಹುಡಿ, ಕ್ಯಾಪ್ಸಿಕಂ ಮಸಾಲಕ್ಕೆ ಹೊಸ ರುಚಿಯನ್ನು ನೀಡುತ್ತದೆ. ಜೊತೆಗೆ ಗ್ರೇವಿ ದಪ್ಪಗಾಗುವಂತೆ ಮಾಡುತ್ತದೆ.
  • ಮೆಣಸಿನ ಹುಡಿ ಜಾಸ್ತಿ ಬಳಸಬೇಡಿ. ಯಾಕೆಂದರೆ, ಒಂದುವೇಳೆ ಖಾರ ಹೆಚ್ಚಾದರೆ ಅದರ ಉರಿಯ ತೀಕ್ಷ್ಣತೆಯನ್ನು ಕಡಿಮೆ ಮಾಡಲು ಏನೂ ಮಾಡಲು ಸಾಧ್ಯವಿಲ್ಲ. ಆಗ ಹೆಚ್ಚು ಸವಿಯಲು ಆಗದು.
  • ಕ್ಯಾಪ್ಸಿಕಂ ಹೋಳು ಬಹಳ ಸಣ್ಣದಾದರೆ ಕಾವಿನಲ್ಲಿ ಕರಗಿ ಹೋಗುತ್ತದೆ. ಹಾಗೆಂದು ಬಹಳ ದೊಡ್ಡದಿದ್ದರೆ ಗ್ರೇವಿಯ ಜತೆ ಮಿಕ್ಸ್ ಆಗುವುದಿಲ್ಲ. ಹಾಗೂ ಕ್ಯಾಪ್ಸಿಕಂ ತಕ್ಷಣವೇ ಉಪ್ಪು, ಖಾರ ಎಳೆದುಕೊಳ್ಳುವುದಿಲ್ಲ.
  • ಎಣ್ಣೆ ಜಾಸ್ತಿಯಾದರೂ ಚೆನ್ನಾಗಿ ಎನಿಸದು. ಆದರೆ, ಅತಿ ಕಡಿಮೆಯಾದರೆ, ಡ್ರೈ ಎನಿಸುತ್ತದೆ. ಹಾಗಾಗಿ ಅಗತ್ಯವಿದ್ದಷ್ಟೇ ಬಳಸಿ.
  • ಇದು ರೆಡ್ ಮಸಾಲ. ಗ್ರೀನ್ ಮಸಾಲ ಬೇರೆ.

ಈರುಳ್ಳಿ ತಂಬುಳಿ

Three onions on a white background.

ತಂಬುಳಿ ಆರೋಗ್ಯಕ್ಕೆ ಬಹಳ  ಒಳ್ಳೆಯದು. ಸ್ವಲ್ಪ ನೀರಿನ ಪದಾರ್ಥವಾದದ್ದರಿಂದ  ಊಟದ ಮೊದಲ ಭಾಗದ ಅನ್ನವನ್ನು ಇದರೊಂದಿಗೆ ಕಲಿಸಿಕೊಂಡು ತಿನ್ನುವುದು ರೂಢಿ. ಇದರಿಂದ ಸಂಕುಚಿತವಾದ ಅನ್ನ ನಾಳದೊಳಗೆ ಸುಲಭವಾಗಿ ನೀರಿನಂಶವಿರುವ ಪದಾರ್ಥ  ಇಳಿಯಬಲ್ಲದು. ನಂತರ  ಉಳಿದ ಗಟ್ಟಿ ಪದಾರ್ಥ ತಿನ್ನುವುದು ಸುಲಭವೆನ್ನುವುದೂ ತಂಬುಳಿಯ ಶೋಧನೆಯ ಹಿಂದಿದೆ.

ಮೆಂತ್ಯೆ, ಒಂದೆಲಗ (ಬ್ರಾಹ್ಮಿ), ಜೀರಿಗೆಯಲ್ಲದೇ ಇತ್ಯಾದಿ ಸೊಪ್ಪುಗಳ ತಂಬುಳಿ ಮಾಡುವ ಕ್ರಮವಿದೆ. ಬೆಳ್ಳುಳ್ಳಿಯ ತಂಬುಳಿಯೂ ಬಹಳ ಚೆನ್ನಾಗಾಗುತ್ತದೆ. ನಾನು ಉಲ್ಲೇಖಿಸುತ್ತಿರುವುದು ಈರುಳ್ಳಿ ತಂಬುಳಿ.

ಮನೆಯ ನಾಲ್ಕು ಜನಕ್ಕೆ, ಒಂದು ಊಟದ ಲೆಕ್ಕದಲ್ಲಿ ಬೇಕಾಗುವ ಸಾಮಾನು

ಮೂರು ಸ್ವಲ್ಪ ದೊಡ್ಡ ಈರುಳ್ಳಿ (ಕುಮಟಾ ಭಾಗದ ಚಿಕ್ಕ  ಈರುಳ್ಳಿಯಾದರೆ ಸುಮಾರು 7-8 ಬೇಕು)

10-15 ಕೊತ್ತಂಬರಿ ಕಾಳು

ಒಂದೆರಡು ಹಸಿಮೆಣಸು

ಎರಡು ಚಮಚ ಎಣ್ಣೆ

ಒಂದು ಚಿಕ್ಕ ಲೋಟ ಮಜ್ಜಿಗೆ

ಸ್ವಲ್ಪ ತೆಂಗಿನಕಾಯಿ

*

ಸಿಪ್ಪೆ ಬಿಡಿಸಿದ ಈರುಳ್ಳಿಯನ್ನು ಸ್ವಲ್ಪ ಸಣ್ಣಗೆ ಚೂರು ಮಾಡಿ, ಒಂದೆರಡು ಚಮಚ  ಎಣ್ಣೆ ಹಾಕಿ, ಈರುಳ್ಳಿಯನ್ನು ಕೆಂಪಗಾಗುವಷ್ಟು ಹುರಿಯಬೇಕು. ಇನ್ನೇನು ಕೆಂಪಗಾಗುತ್ತಿದೆ ಎನ್ನುವಾಗ ಕೊತ್ತಂಬರಿ ಬೀಜವನ್ನು ಹಾಕಿಕೊಂಡು ಹುರಿಯಬೇಕು. ನಂತರ ತುರಿದ ತೆಂಗಿನಕಾಯಿ, ಹಸಿಮೆಣಸನ್ನು ಇದರೊಂದಿಗೆ ಬೆರೆಸಿ ಅರೆಯಬೇಕು. ತದನಂತರ, ಮಜ್ಜಿಗೆಯೊಂದಿಗೆ ಬೆರೆಸಬೇಕು. ಅಗತ್ಯವಿದ್ದರೆ ಒಂದು ಒಗ್ಗರಣೆಯನ್ನು ಕೊಡಬಹುದು.

ಟಿಪ್ಸ್ :

1.  ಅರೆದು ಸಿದ್ಧವಾದ ತಂಬುಳಿಗೆ ಒಗ್ಗರಣೆ ಕೊಡುವಾಗ  ಈರುಳ್ಳಿಯನ್ನು ಚಿಕ್ಕದಾಗಿ ಕತ್ತರಿಸಿ, ಹುರಿದು ಮಿಕ್ಸ್ ಮಾಡಿದರೆ ರುಚಿ ಬಹಳ ಭಿನ್ನವಾಗಿರುತ್ತದೆ.

2. ಕೊತ್ತಂಬರಿ ಬದಲು ಜೀರಿಗೆಯನ್ನೂ ಬಳಸಬಹುದು. ಆದರೆ, ಆಗ ಈರುಳ್ಳಿಯ ಪರಿಮಳ ಬರುವುದು ಕಡಿಮೆ, ಜೀರಿಗೆಯ  ಪರಿಮಳವೇ ಬರುತ್ತದೆ.

3. ಕುಮಟಾದ ಬದಿಯ  ಈರುಳ್ಳಿ ಸ್ವಲ್ಪ ಸಿಹಿ ಅಂಶವನ್ನು ಹೊಂದಿರುವುದರಿಂದ, ಅದನ್ನು ಬಳಸಿದರೆ ಇನ್ನೂ ರುಚಿ.

4. ಒಗ್ಗರಣೆಯ ಸಂದರ್ಭದಲ್ಲಿ ಇಂಗನ್ನೂ ಬಳಸಬೇಡಿ. ಬಳಸಿದರೆ ಅದರ ಪ್ರಯೋಜನವಿರದು.

5. 15 ನಿಮಿಷದಲ್ಲಿ ಮಾಡಿ ಮುಗಿಸಬಹುದಾದ ಪದಾರ್ಥ.

6. ಕೆಂಪು ಮೆಣಸನ್ನೂ ಬಳಸಬಹುದು.

7. ಹೆಚ್ಚು ಮೆಣಸು ಬಳಸಬೇಡಿ. ಊಟದ  ಆರಂಭದಲ್ಲೇ ಖಾರ  ಎನಿಸಿದರೆ ಉಳಿದದ್ದರ ಬಗ್ಗೆ ಆಸಕ್ತಿ ಹೋಗಬಹುದು.

ಬ್ಯಾಚುಲರ್ ಕಿಚನ್ ನಲ್ಲಿ ಮೆಂತ್ಯೆ ಸೊಪ್ಪಿನ ಪಲಾವು

ಮೆಂತ್ಯ ಸೊಪ್ಪಿನಲ್ಲಿ ಪಲಾವು ಮಾಡುವುದೆಂದರೆ ಸುಲಭ. ಆಗಾಗ್ಗೆ ವೆಜಿಟೆಬಲ್ ಪಲಾವು ಮಾಡಿ ಮಾಡಿ ಬೇಸರವಾದವರಿಗೆ ಅಷ್ಟೇ ಅಲ್ಲ. ಬ್ಯಾಚುಲರ್ ಕಿಚನ್ ನಲ್ಲೂ ಈ ಪಲಾವು ಮಾಡುವುದು ಸುಲಭ.

ಮೆಂತ್ಯ ಸೊಪ್ಪಿನ ಜತೆಗೆ ಬಹಳಷ್ಟು ಸಾಮಗ್ರಿಗಳು ಇದ್ದರೂ ಆದೀತು, ಇಲ್ಲದಿದ್ದರೂ ಆದೀತು. ಬಹಳ ಸರಳವಾಗಿ ಹೇಳುವುದಾದರೆ, ಬೇಕಾಗುವ ಸಾಮಾನುಗಳು ಇಷ್ಟೇ.

methi

ಮೂರು ಮಂದಿಗೆ ಆಗುವಂತೆ

1. ಕಾಲು ಕೆಜಿ ಅಕ್ಕಿ(ಬಾಸುಮತಿಯೆ ಬೇಕಾಗಿಲ್ಲ, ಸಾಮಾನ್ಯವಾದ ಅಕ್ಕಿಯಾದರೂ ಸಾಕು)

2. ಒಂದುಕಟ್ಟು ಎಳೆ ಮೆಂತ್ಯೆ ಸೊಪ್ಪು

3. ಮೂರು ಈರುಳ್ಳಿ

4. ಎರಡು ಕ್ಯಾರೆಟ್

5. ಒಂದು ಆಲೂಗೆಡ್ಡೆ

6. ಹತ್ತು ಬೀನ್ಸ್

7. ಎರಡು ತುಂಡು ಚಕ್ಕೆ

8. ಒಂದೆರಡು ಏಲಕ್ಕಿ

9. ಲವಂಗ 2

10. ಹಸಿಮೆಣಸು 3

11. ಸ್ವಲ್ಪ ತೆಂಗಿನಕಾಯಿ

12. 50 ಗ್ರಾಂನಷ್ಟು ಬಟಾಣಿ ಕಾಳು

13. ಹತ್ತೇ ಕಾಳು ಮೆಂತ್ಯೆ

14. ಐದು ಟೀ ಚಮಚ  ಎಣ್ಣೆ (ರೀಫೈನ್ಡ್ ಆಯಿಲ್/ಕಡಲೆಕಾಯಿ ಎಣ್ಣೆ/ಒಳ್ಳೆಣ್ಣೆ/ತೆಂಗಿನೆಣ್ಣೆ)

15. ಒಂದು ತುಂಡು ಬೆಲ್ಲ

16. ಅಗತ್ಯದಷ್ಟು ಉಪ್ಪು Continue reading “ಬ್ಯಾಚುಲರ್ ಕಿಚನ್ ನಲ್ಲಿ ಮೆಂತ್ಯೆ ಸೊಪ್ಪಿನ ಪಲಾವು”

ಟೊಮೆಟೊ ರೈಸ್ ಬಾತು-ಹೀಗೂ ಮಾಡಬಹುದು

ಟೊಮೆಟೋ ರೈಸ್ ಬಾತ್ ಹೀಗೆ ಮಾಡಿ ನೋಡೋಣ ಅನ್ನಿಸಿತು. ಮಾಡಿದೆವು, ಚೆನ್ನಾಗಿ ಆಯಿತು.
ಸಾಮಾನ್ಯವಾಗಿ ಟೊಮೆಟೊ ರೈಸ್ ಬಾತ್ ಮಾಡುವ ವಿಧಾನವೆಂದರೆ, ಒಗ್ಗರಣೆ ಹಾಕಿ, ಅದಕ್ಕೆ ಗರಂ ಮಸಾಲೆ, ಕಾಯಿ ಅರೆದದ್ದನ್ನು ಹಾಕಿ, ಹುರಿದಂತೆ ಮಾಡಿ, ನೀರನ್ನು ಹಾಕಿ ಕುದಿಸಿ, ಅಕ್ಕಿ ಹಾಕಿ, ಬೆಂದ ಮೇಲೆ ಇಳಿಸಿಬಿಡುವುದು.

ಇನ್ನೊಂದು ರೀತಿ ಹೀಗೆ ಮಾಡಬಹುದು.

  1. ಒಂದು ಲೋಟ ಅಕ್ಕಿ
  2. ನಾಲ್ಕು ಟೊಮೆಟೊ
  3. ಸ್ವಲ್ಪ ಹುಣಸೆಹಣ್ಣು
  4. ಕೊತ್ತಂಬರಿ ಸೊಪ್ಪು
  5. ಕರಿಬೇವಿನ ಸೊಪ್ಪು
  6. ಮೂರು ಹಸಿಮೆಣಸು
  7. ಒಗ್ಗರಣೆಗೆ ಸಾಸಿವೆ
  8. ಎರಡು ಈರುಳ್ಳಿ
  9. ಬೆಳ್ಳುಳ್ಳಿ ಎಂಟ್ಹತ್ತು ಎಸಳು (ಬೇಕಾಗಿದ್ದರೆ)
  10. ನಿಮ್ಮ ಕೈ ಬೆರಳಿನ ಅರ್ಧದಷ್ಟು ಗಾತ್ರದ ಚಕ್ಕೆ
  11. ಒಂದೆರಡು ಮರಾಠ್ ಮೊಗ್ಗು
  12. ಒಂದೆರಡು ಲವಂಗ
  13. ಕೊತ್ತಂಬರಿ ಕಾಳು 20 ಗ್ರಾಂ ನಷ್ಟು
  14. ಐದು ಗ್ರಾಂನಷ್ಟು ಜೀರಿಗೆ
  15. ಎಂಟು ಒಣಮೆಣಸು
  16. ಕಾಲು ತೆಂಗಿನಕಾಯಿ (ಇದೂ ಬೇಕಾದವರು ಬಳಸಬಹುದು)

(ಸಾಮಾನ್ಯ ಮಾದರಿಯ ಟೊಮೆಟೊ ರೈಸ್ ಬಾತ್ ಗೂ ಇಷ್ಟೇ ಸಾಮಗ್ರಿಗಳು ಬೇಕು)

ಮೊದಲು ಅನ್ನವನ್ನು ಮಾಡಿಟ್ಟುಕೊಳ್ಳಿ. ಆದಷ್ಟು ಉದುರುಉದುರಾಗಿರಲಿ, ಮುದ್ದೆಯಾದರೆ ಚೆನ್ನಾಗಿರದು. ಎರಡು ವಿಶಲ್ ಆದ ಕೂಡಲೇ ಕುಕ್ಕರ್‌ನ್ನು ಕೆಳಗಿಟ್ಟರೆ ಸಾಕು.

ಲವಂಗ, ಮರಾಠ್ ಮೊಗ್ಗು, ಚಕ್ಕೆ, ಕೊತ್ತಂಬರಿ ಕಾಳು, ಜೀರಿಗೆಯನ್ನು ಹುರಿದಿಟ್ಟುಕೊಳ್ಳಿ. ಹುರಿಯುವುದೆಂದರೆ ಎಣ್ಣೆ ಹಾಕಿಯಲ್ಲ. ಹಾಗೆಯೇ, ಚೆನ್ನಾಗಿ ಬಿಸಿಯಾಗುವಂತೆ, ಅದರ ಹಸಿ ವಾಸನೆ ಹೋಗುವವರೆಗೆ ಹುರಿದರೆ ಸಾಕು.

ನಂತರ ಒಣಮೆಣಸು, ಅದಕ್ಕೆ ಸ್ವಲ್ಪ ಎಣ್ಣೆ ಹಾಕಿ (ಮೆಣಸಿನಕಾಯಿ ಮುಳುಗಿದಂತೆ ತೋರುವಷ್ಟು, ಸಂಪೂರ್ಣ ಮುಳುಗುವಷ್ಟಲ್ಲ), ಚೆನ್ನಾಗಿ ಹುರಿಯಿರಿ. ಸ್ವಲ್ಪ ತಣ್ಣಗಾಗಲು ಬಿಡಿ ಎಲ್ಲವನ್ನೂ.

ನಾಲ್ಕು ಟೊಮೆಟೊನಲ್ಲಿ ಒಂದೆರಡನ್ನು ಸ್ವಲ್ಪ ಸಣ್ಣ ಹೋಳುಗಳನ್ನಾಗಿ, ಇನ್ನೆರಡನ್ನು ಉದ್ದುದ್ದ ಸೀಳನ್ನಾಗಿ ಮಾಡಿಟ್ಟುಕೊಳ್ಳಿ. ಉದ್ದುದ್ದ ಸೀಳಿದ್ದದ್ದನ್ನು, ಆ ಒಣಮೆಣಸು ಹುರಿದು ಉಳಿದಿದ್ದ ಎಣ್ಣೆಯಲ್ಲಿ ಹಾಫ್ ಫ್ರೈ ಮಾಡಿ. ನಂತರ ಅದನ್ನು ತೆಂಗಿನಕಾಯಿ ಮತ್ತು ಮಸಾಲೆಯೊಂದಿಗೆ ಸೇರಿಸಿ ಅರೆಯಿರಿ. (ಬೆಳ್ಳುಳ್ಳಿ ಹಾಕುವವರು ಈ ಅರೆಯುವ ಸಾಮಗ್ರಿಯೊಂದಿಗೆ ಸೇರಿಸಿ ಅರೆದಿಡಬೇಕು)

ಈರುಳ್ಳಿಯನ್ನು ತೆಳುವಾಗಿ, ಉದ್ದುದ್ದ ಸೀಳಿಕೊಳ್ಳಿ. ಅನ್ನದ ಪಾತ್ರೆಯನ್ನು ತೆಗೆದು, ಅಗಲವಾದ ತಟ್ಟೆಗೆ ಅನ್ನವನ್ನು ಹರಡಿಸಿಟ್ಟುಕೊಳ್ಳಿ.
ಬಾಣಲೆಗೆ ಎಣ್ಣೆಯನ್ನು ಹಾಕಿ ಒಲೆ ಹಚ್ಚಿ, (ಇಲ್ಲೂ ಎಣ್ಣೆ ಜಾಸ್ತಿ ಬೇಕು ಎನಿಸಿದವರು, ತಮಗೆ ಸೂಕ್ತವೆನಿಸುವಷ್ಟು ಹಾಕಿಕೊಳ್ಳಬಹುದು) ಆಮೇಲೆ ಹತ್ತು ಕಾಳು ಜೀರಿಗೆ ಹಾಕಿ, ನಂತರ ಕರಿಬೇವು ಹಾಕಿ, ಸಣ್ಣಗೆ ಮಾಡಿದ ಈರುಳ್ಳಿ ಹಾಕಿ ಫ್ರೈ ಮಾಡಿ. ನೀರು ಬಳಸಬೇಡಿ. ಈರುಳ್ಳಿ ಸ್ವಲ್ಪ ಕೆಂಪಗಾಗುತ್ತಿದ್ದಂತೆ ಟೊಮೆಟೋ ಹಾಕಿ. ಚೆನ್ನಾಗಿ ಹುರಿಯಿರಿ. ನೆನಸಿಟ್ಟ ಹುಣಸೆಹಣ್ಣನು ಹಿಂಡಿ ರಸ ತೆಗೆದು, ಅದನ್ನು ಬಾಣಲೆಗೆ ಹಾಕಿ. ಒಂದು ಚಮಚದಷ್ಟು ಸಕ್ಕರೆ, ಅಗತ್ಯದಷ್ಟು ಉಪ್ಪು ಹಾಕಿ ಹುರಿಯಿರಿ. ಟೊಮೆಟೊ ಕರಗಿದಂತೆ ಕಂಡುಬಂದು, ರಸ ಬಿಡತೊಡಗುತ್ತದೆ. ಆಗ ಅರೆದ ಮಸಾಲೆ ಹಾಕಿ ಮಿಕ್ಸ್ ಮಾಡಿ. ಮಸಾಲೆಯನ್ನು ಫ್ರೈ ಮಾಡಬೇಕು ಚೆನ್ನಾಗಿ. ಆಗ ಹಸಿ ವಾಸನೆಯೆಲ್ಲಾ ಹೋಗಿ, ಹೊಸ ಪರಿಮಳ ಬರತೊಡಗುತ್ತದೆ. ಆಗ ಅನ್ನವನ್ನು ಚೆನ್ನಾಗಿ ಮಿಕ್ಸ್ ಮಾಡಿ.

ಮತ್ತೆ ಬಾಣಲಿಯಿಟ್ಟು, ಹಸಿಮೆಣಸನ್ನು ಸ್ವಲ್ಪ ಸಣ್ಣ ಸಣ್ಣ ಹೋಳು ಮಾಡಿ, ಸೀಳಿಕೊಂಡು, ಅದನ್ನು ಕಾದ ಎಣ್ಣೆಯಲ್ಲಿ ಕರಿಯಿರಿ. ಬಳಿಕ ಅದನ್ನು ಈ ಅನ್ನದೊಂದಿಗೆ ಮಿಕ್ಸ್ ಮಾಡಿ. ಸಣ್ಣಗೆ ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಇದರ ಮೇಲೆ ಹರಡಿ ಅಲಂಕಾರ ಮಾಡಿ. ಇದಕ್ಕೆ ಜತೆಗೆ ಬೇರೇನೂ ಇಲ್ಲದಿದ್ದರೂ ಪರವಾಗಿಲ್ಲ.

ಟಿಪ್ಸ್

  1. ಎಣ್ಣೆಯ ಬದಲು ತುಪ್ಪವನ್ನೂ ಬಳಸಬಹುದು. ಆದರೆ, ಎಣ್ಣೆಗಿರುವಷ್ಟು ತೇಜಿ ಗುಣ ತುಪ್ಪಕ್ಕಿರದು.
  2. ಮಸಾಲೆ ಸಾಮಾನುಗಳನ್ನು ಜಾಸ್ತಿ ಎಣ್ಣೆಯಲ್ಲಿ ಕರಿದಂತೆ ಹುರಿಯುವ ಅಭ್ಯಾಸವೂ ಇದೆ. ಅದು ಎಲ್ಲದಕ್ಕೂ ಚೆಂದವಲ್ಲ. ಬಿಸಿಬೇಳೆಬಾತ್ ಗೆ ಹಾಗೆ ಕರಿದರೆ ಚೆಂದ.
  3. ಸಾಮಾನ್ಯವಾಗಿ ಈಗ ಸಿಗುವ ಟೊಮೆಟೊ ಹುಳಿ ಕಡಿಮೆ ಇರುವುದರಿಂದ, ಹುಣಸೆಹಣ್ಣನ್ನೂ ಜತೆಗೆ ಬಳಸುವುದು ಸೂಕ್ತ.
  4. ಅರೆದಮಸಾಲೆಯನ್ನು ಸರಿಯಾಗಿ ಹುರಿಯದಿದ್ದರೆ, ಸಂಜೆಯಾಗುವುದರೊಳಗೆ ಬಾತು ಹಳಸಿದಂತೆ ವಾಸನೆ ಬರುತ್ತದೆ.
  5. ಕರಿದ ಹಸಿಮೆಣಸು ಬೇರೆಯದೇ ರುಚಿಯನ್ನು ನೀಡುತ್ತದೆ.
  6. ಬಹಳ ಹಸಿ ಖಾರ ಬೇಕೆನ್ನುವವರು ನಾಲ್ಕು ಮೆಣಸು ಜಾಸ್ತಿ ಕರಿದುಕೊಳ್ಳಬಹುದು.
  7. ಕೊನೆಯಲ್ಲಿ ಮತ್ತೆರಡು ಈರುಳ್ಳಿಯನ್ನು ಸಣ್ಣದಾಗಿ ಕತ್ತರಿಸಿ, ಬಾತಿನೊಂದಿಗೆ ಹಸಿಯಾಗಿಯೇ ಮಿಕ್ಸ್ ಮಾಡಿದರೂ ರುಚಿ ಭಿನ್ನವಾಗಿರುತ್ತದೆ.

ಮಸಾಲೆ ವಡೆ

ಹೊಸ ರುಚಿ ಬರೆಯದೇ ಐದು ತಿಂಗಳಾಯಿತು. ಹೀಗೇ ಏನೋ ಕೆಲಸ, ಅದರ ಮಧ್ಯೆ ಬಿಡುವು ಮಾಡಿಕೊಂಡರೂ ಮತ್ತೇನೋ ಕಿರಿಕಿರಿ. ಒಟ್ಟೂ ಐದು ತಿಂಗಳು ಕಳೆದದ್ದೇ ತಿಳಿಯಲಿಲ್ಲ.

ಮಸಾಲೆ ವಡೆ ಮಾಡೋದು ಹೇಗೆ?

ಎರಡು ಮುಷ್ಟಿಯಷ್ಟು ಕಡ್ಲೆಬೇಳೆ, ಸ್ವಲ್ಪವೇ ಸ್ವಲ್ಪ ಉದ್ದಿನಬೇಳೆ ನೀರಿನಲ್ಲಿ ನೆನಸಿಡಿ. ಸುಮಾರು ಒಂದುಗಂಟೆಯಷ್ಟು ನೆನೆಯಲಿ. ಉದ್ದಿನಬೇಳೆ ಸ್ವಲ್ಪಕ್ಕಿಂತ ಹೆಚ್ಚಾಗಬಾರದು. ಅನಂತರ ಚೆನ್ನಾಗಿ ತೊಳೆದು ಗ್ರೈಂಡರ್ ನಲ್ಲಾದರೆ ಒಂದೆರಡು ಸುತ್ತು ಸುತ್ತಿ. ಮಿಕ್ಸಿಯಲ್ಲಾದರೂ ಹಾಕಿ ತೆಗೆದರೆ ಸಾಕು.

ಅದಕ್ಕೆ ಶುಂಠಿ, ಕರಿಬೇವು, ಬೇಕಿದ್ದರೆ ಕೊಬ್ಬರಿ-ತೆಂಗಿನಕಾಯಿ ತುಂಡು ಹಾಕಿ.ಇವೆಲ್ಲವೂ ಸಣ್ಣಗೆ ಕತ್ತರಿಸಿರಬೇಕು. ಆಮೇಲೆ ಉಪ್ಪು ಹಾಕಿ ಕಲಸಿ. ಒಲೆಯ ಮೇಲೆ ಇಟ್ಟ ಎಣ್ಣೆ ಹದ ಕಾವು ಬಂದ ಕೂಡಲೇ, ಕಲಸಿಟ್ಟ ಹಿಟ್ಟನ್ನು ಸಣ್ಣ ಸಣ್ಣಗೆ ಉಂಡೆ ಮಾಡಿ, ಕೈಯಲ್ಲಿ ತಟ್ಟಿ ಎಣ್ಣೆಗೆ ಬಿಡಿ.  ಕೆಂಪಗಾಗುತ್ತಿದ್ದಂತೆ ತೆಗೆದು ಇಟ್ಟರೆ ಮುಗಿಯಿತು.

ಈರುಳ್ಳಿ ಹಾಕಬೇಕೇ ? ಬೇಡವೇ?

ಈರುಳ್ಳಿ ಸಾಮಾನ್ಯವಾಗಿ ಮಸಾಲೆ ವಡೆಗೆ ಹಾಕುವವರೂ ಇದ್ದಾರೆ, ಹಾಕದೇ ಇದ್ದವರೂ ಇದ್ದಾರೆ. ಹೋಟೆಲ್, ತಿಂಡಿಗಾಡಿಗಳಲ್ಲಿ ಈರುಳ್ಳಿ ಹಾಕುತ್ತಾರೆ. ಆದರೆ, ಈರುಳ್ಳಿ ಹಾಕದಿದ್ದರೆ ಬೇರೆ ರುಚಿ, ಹಾಕಿದರೇ ಬೇರೆ ರುಚಿ.

ಟಿಪ್ಸ್ 

1. ಈರುಳ್ಳಿ ಹಾಕಿದರೆ ಕಡ್ಲೆಬೇಳೆ ವಡೆ ಗರಿಗರಿಯಾಗಿರದು.

2. ಈರುಳ್ಳಿ ಹಾಕಿದರೆ, ಮಾರನೇ ದಿನ ಇಟ್ಟ ವಡೆ ತಿನ್ನಲು ಕಷ್ಟ.

3. ಈರುಳ್ಳಿ ಹಾಕದಿದ್ದರೆ ಮೂರು ದಿನ ವಡೆ ಇಟ್ಟರೂ ಹಾಳಾಗದು.

4. ಈರುಳ್ಳಿ ಹಾಕದಿದ್ದರೆ, ಸ್ವಲ್ಪ ಇಂಗನ್ನು ಹಾಕಬಹುದು. ಆದರೆ, ಅದೇನೋ ರುಚಿಯಲ್ಲಿ ದೊಡ್ಡ ವ್ಯತ್ಯಾಸವೇನನ್ನೂ ಮಾಡದು. ಇಂಗು, ವಾಯುವಿನ ಅಂಶವನ್ನು ಕೊಲ್ಲುತ್ತದೆ.

5. ಎಣ್ಣೆ ಜೋರಾದ ಕಾವಿರುವುದು ಬೇಡ. ಹದ ಕಾವಿನಲ್ಲಿ ವಡೆ ಕರಿದರೆ, ಚೆನ್ನಾಗಿ ಬೇಯುತ್ತದೆ.

6. ಹಾಗೆಂದು ಬಹಳ ಎಳೆ ಕಾವಿನಲ್ಲಿಟ್ಟರೆ, ಎಣ್ಣೆ ಕುಡಿಯುತ್ತದೆ.

7. ಉದ್ದಿನಬೇಳೆ, ಕಡ್ಲೆಬೇಳೆಯಲ್ಲಿರುವ ಸ್ಟಿಫ್ಟೆಸ್ (ಗಡಸುಗುಣ)ವನ್ನು ಕಡಿಮೆಗೊಳಿಸಿ, ಮೃದುವಾಗಿಸುತ್ತದೆ.

8. ಸಾಮಾನ್ಯವಾಗಿ ಶುಂಠಿ ಹಾಕಿದರೆ, ಇಂಗು ಹಾಕುವುದು ಬೇಡ. ಎರಡಕ್ಕೂ ಘಾಟಿನ ಗುಣವಿದ್ದು, ಒಂದನ್ನು ಮತ್ತೊಂದು ಹತ್ತಿಕ್ಕುತ್ತದೆ.

9. ಬೇಳೆ ಕನಿಷ್ಠ ಒಂದು ಗಂಟೆ ನೆನೆಸಿದರೆ ಸಾಕು, ಅದಕ್ಕಿಂತ ಮೊದಲು ತೆಗೆದರೆ ಬೇಳೆ ಸರಿಯಾಗಿ ಮೃದುವಾಗಿರದು. ಆಗ ಅರೆದರೂ ವಡೆಯಲ್ಲಿ ಕಾಂತಿ ಇರದು.

10. ಇದಕ್ಕೆ ಸೊಪ್ಪು (ಕೊತ್ತಂಬರಿ, ಅರವೆ ಸೊಪ್ಪು) ಇತ್ಯಾದಿಯನ್ನು ಹಾಕಿ ಸೊಪ್ಪಿನ ವಡೆಯನ್ನೂ ಮಾಡಬಹುದು.

ಕೊಡಕ್ಯನ ಅಥವಾ ಮಜ್ಜಿಗೆ ಹುಳಿ

ಕೊಡಕ್ಯನ ದಕ್ಷಿಣ ಕನ್ನಡದ ಪದಾರ್ಥ ಅಂದರೆ ಮೇಲೋಗರ. ಕೆಲವೆಡೆ ಇದನ್ನೇ ಮಜ್ಜಿಗೆಹುಳಿ ಎಂದೂ ಕರೆಯುತ್ತಾರೆ.

ಸಾಮಾನ್ಯವಾಗಿ ಇದಕ್ಕೆ ಬಳಸುವ ತರಕಾರಿಗಳು ಜೀಹಲಸಿನಕಾಯಿ (ಜೀಕುಜ್ಜೆ), ಮಂಗಳೂರು ಸೌತೆಕಾಯಿ, ಬೂದು ಕುಂಬಳಕಾಯಿ, ತೊಂಡೆಕಾಯಿ.

ಮಾಡೋದು ಬಹಳ ಸುಲಭ. ಯಾವುದೇ ಅಬ್ಬರವಿಲ್ಲದ ಮೇಲೋಗರವಿದು. ಅದಕ್ಕಾಗಿಯೇ ಹೇಳಿದ್ದು ಇದು ಸರಳ ಜೀವಿ. Continue reading “ಕೊಡಕ್ಯನ ಅಥವಾ ಮಜ್ಜಿಗೆ ಹುಳಿ”